2019年初我隻身由深圳嚟到香港為一間初創公司擔任市場策劃部經理一職。老實講，市場策劃並唔係啲咩專才技能，每年中港台日韓星馬泰BBA畢業嘅人數以億計，競爭性當然非常大，冇際遇冇人脈的話最叻都只可以做到大茄位，月薪四萬更加係天方夜譚，就因為芮玥我先有個咁嘅機會由谷底反彈 (建行份工月薪只有$9500)。香港對我哋深圳人嚟講其實只係一個高配版嘅深圳，啲嘢靚啲貴啲、乾淨啲、有系統啲同埋大部分人都係講廣東話 (深圳有四成人口都係講普通話)，由於我出身廣州母語係廣東話，所以落到嚟香港係特別親切同易於適應，香港人當然有啲排外會話我哋係落去同佢哋搶資源嘅大陸喱但當佢哋知我係廣州人又好似好返少少，可能大家都覺得廣州人比較有文化，亦因為大家嘅廣東話口音相近，所以溝通起上嚟比較自然，好似中山、廣西、潮汕依啲較重當地口音嘅廣東話就一定俾香港人歧視到跳海。